صوت الشارع
مقالات وكتاب
هترشات | شوقي سليمان أحمد | حبوباتنا كانن بقولهم: الولادة هينة لكن صعبة الرباية
#الاطفال_وغياب_الأسرة
حبوباتنا كانن بقولهم: الولادة هينة لكن صعبة الرباية.
التربية والأطفال وكثير من الحوارات التى تدور يوميا ٓٓ على طاولة النقاشات ، فى ظل تلك الظواهر السالبة لبعض الاطفال على الشارع العام ناتج عن سوء التربية ، و غياب تام لمتابعة الأسرة لهم.
من الحاجات اللافتة للأنظار ،الشكل العام للطفل، من ملابس متسخة ، وألفاظ نابئة، و تواجده على طول فى الشارع العام ..
الواحد تلقاهو حفيان 24 ساعة ، حايم من شارع لى شارع ، ومن زقاق لي زقاق..يلاطع الكبير والصغير بلا ادني إحترام.
والمصيبة انو ما بسمعوا كلام زول كبير ، ولا بحترموا الشارع العام… والمصيبة الاكبر انو امو وابوه لو قلت ليهم كدا القيامة قامت… يعني الموضوع عاجبهم شديد.
السؤال الذى يدور :
هل المشكلة في الأهل؟ ولا في الحرب؟ ولا في الفقر؟ ولا فينا كلنا كمجتمع سكتنا على الإهمال؟
تربية الطفل ما بس أكل وشراب.. تربية يعني كرامة، ونضافة، وملعب آمن، وكلمة طيبة، ومدرسة.. الطفل المهمل اليوم هو الرجل الضائع بكرة… يعني مستقبل باي باي …
*السؤال المطروح للنقاش:*
من المسؤول عن الطفل اللي في الشارع؟
الأب والأم براهم؟ ولا الحلة كلها مسؤولة؟
وإحنا كمجتمع.. بنعمل شنو عشان نحمي هؤلاء من الضياع… مع غياب تام للاسرة؟
فالمجتمع هو المتضرر الأكبر من سوء التربية الصحيحة ، بمعني ضياع طفل هو ضياع أمة بأكملها
