شخصيات سودانيةشخصيات من كردفان
من كردفان | فيصل حيدر حمد السيد | القصة الكاملة لزواج إبنة الشاعر ناصر قاسم عثمان بريمة (بصاع من تمر)
صوت الشارع
من كردفان | فيصل حيدر حمد السيد | القصة الكاملة لزواج إبنة الشاعر ناصر قاسم عثمان بريمة (بصاع من تمر)
حدث مثير وفريد وجميل في مدينة الابيض:
القصة الكاملة لزواج إبنة الشاعر ناصر قاسم عثمان بريمة (بصاع من تمر)
كتب/#فيصل حيدر
في زمن أصبح فيهو المهر أرقام يثقل كاهل الشباب وبيوت بتتعطل عشان “العادات”.
بتطلع لينا من قلب كردفان لفته بترد الروح وبتذكرنا بأصلنا.
وفي بيت الأدب والشعر في حي الربع الأول ومن مدرسة عمنا الشاعر الكبير قاسم عثمان بريمة إتكتب عقد قران ما زي اي عقد الصداق كان”صاع من تمر”كانت رسالة اكبر من اي مال.
العروس”غفران” دي نفس البنت الكانت في الصف الرابع اساس وسؤالها لوالدها وبكل براءة الأطفال ليه يابا بيتنا جالوص.
ونفس الأب الشاعر ناصر قاسم رد عليها بقصيدته الشهيرة (بيت الجالوص) ويغرس فيها الرضا والقناعة
اليوم نفس البنت تقبل تتزوج “بصاع من تمر” الأب كان بعلمها القناعة موافق ومبارك.
#الشاعر ناصر قاسم كتب تلك القصيدة لصاحبة (بيت الجالوص) والتي كان صداقها *صاع من تمر”
صاع من تمر
شــاكر الكريــــم علي قِسمتي
في نَصـــيبي جــن لي وردتين
مَـلـــن حـــياتي هـَـــنا وفــرح
فـــي روضـــي كانـــن جَـنّتين
عـايش الســـعادة في قربهن
فــي عـُــمري أجمل ضحكتين
ماليـــات حَــنايا الـــروح رِضا
وكل واحده فيهن ساكنة عين
وكنـــت العـــزيز في جــــنبهن
مــما تبّن وهــــــن صــــــغــــار
عِــــــشنا المــــحنـــة مع بعض
عِشــــــنا اللعب وسمح الهِظار
لافــحــاتنــي طــرحة مَرقــتِن
وكــــتيـــــن يــــــزورن اي دار
وببـــقي السُـــهاد داك صاحِبن
لــــو المــــرض لـــــي مرة زار
وكِبــــرن مــــع الايـــام خلاص
كِبـــــرن بـــــنـــيّــات الــــحلال
راضـــعــــات مــــحنــّــة امـهم
عـــايشات من الــكسب الحـلال
وســـارحات عيوني تمـلّي فيم
وفي بـالي يـوت داك السـؤال
كـــيفن بــكون البـــيت بــلام
لو جــــوم وليــــدات الحَـــلال؟
واِنـــدق ليـــك باب بيــتنا يوم
وبســـــم الله هو الفرد الصــمد
دخلــــو الضــيوف لــي عنــدنا
تــــمانية كــــان كــــل الــعـدد
قـــــالولنا طــــالبـين قـُـــربكم
مــــن الله طالبــــين الــــمـدد
وكان قُــــلتو خير ياهـــوالمُراد
ويبـــقالنا داك يـــوم الســـعد
وبـــالبــــركة ياخ قـُــلناها خير
اهــي فرحـــة حا تضوي العمر
قـــلنا النـــشوف فــــالاً حَـــسن
قبــــل الســـنين تــــجري وتـمر
قبـــــال تغـــــيب الامـــــــنيات
قبال تغيب شمس العمر
وعقدنا في الجامع العتيق
وصداقنا كان (صاع من تمر)
وقت ليها يوم تمشي لبيتك هناك
العافية تبراك وفي مشيك
ورضاي ودعوات السعادة
كل صباح تصلك تجيك
وقبال تفوتي البيت هنا
اعرفي نحنا حانشتهيك
وسامحينا جد ياستهم
لو مره كنا غلطنا فيك
ياعريس بوصيك عليها
ومابتخيب انت ظني
عيشو دنياكم سعادة
وفرحة في بحر التمني
لاالمشاكل تغشي داركم
لاالتعاسة ولا التجني
وابقي عارف يوم تسوقه
انت شايل حته مني
مبادرة الشاعر ناصر قاسم مامجرد زواج دي رسالة للأسر كلها انو العفاف مابتقاس بالمال وان البساطة
هي البتجيب البركة
تحية لأهل الأبيض وتحية لإبنة الشاعر التي وافقت تكون بداية لتغير مفهوم غلط رسخ سنين
نتمني تلك المبادرة تفتح باب للشباب والشابات العايزين الحلال وتكون بداية لعودة الزواج لي اصلو سكن مودة رحمة وبصداق قدره “صاع من تمر”
إتكتب درس في الكرم والرضا حيتحكي للاجيال.
