رهف الاحساس –
قصي بشير عباس –
الوصية ترحال الجسد وشجن القلوب
نحن شعب يعشق الماضي لدرجة الاجترار اليومي مع كل الاجواء صيف وشتاء الحبيب اودفٓ فصول الحبيبه وخريف وربيع اناقة الماضي ، كل ذلك من المخزون البصري للزاكرة نعيده في لحظة سكون بعيدا عن ضجيج الحرب او هموم المعيشة لحظة انفصال مابين زاكرة الروح والجسد ، علي مستوي الاغنيات نجد اننا شعب تشكل خارطة اغنياتها الخالدات اغنيات الشجن والوطن وقليل من اغنيات الحب والفرح ، اكتب هذا المقال وفي مخيلتي صوت الفنان وردي عبر مسجل العربة التي امتطيها مع بعض الرفاق ونحن في اجواء خريفية في مثل هذا التوقيت قبل اعوام نتجول في افريقيا (شمال الوسط) ساحكي في مقال منفصل عن سماعهم للاغنيات السودانية الرحله شملت بنين النيجر تشاد وشمال نيجريا مالي بنين ، وجوه وسحنات وتفاصيل تجعل من اغنيات وردي واسماعيل حسن تسمع وتحس وتتجول بك في كم هائل من صور الماضي ، دهشه الكلمات واللحن والجميع في حالة صمت واجترار للايام الخوالي والوطن حاله لم نصحو منها الا علي صوت حرس الحدود في (انقيمي/انغيمي) مدينة علي الحدود النيجريه التشادية ….
الوصية اغنية يتكي عليها الوجدان في شواطئ ترحال بعيد المدي ، يفتح نفاجات اشتياق تتجاوز حدود الزمان والمكان
مابين سفر للاجساد وسفر للقلوب تفاصيل شجن وفرح لا تعرف الانتهاء ، اغنيات الشجن الجميل تجمعنا وتجعلنا في حالة تحتاج لاكثر من مقال للحديث عنها …
ود حد الزين سماعين حسن كان في الشجن بقول لينا حبو كما يجب ان يكون الحب مع الانتباهه لعظمة ومقدرة سماعين على الإيحاء (خليهو الغرام) وانت احساسك بيها مختلف كانو بقول ليك مابتقدر رغم عذاب الحب (حلفتك ياقلبى خليهو الغرام) هو انت ياسماعين كان قادر علي قلبك كان بتوصيه وكان نحنا استمتعنا بالمفردة المدهشة دي :
إتعذب لوحدك
ليل والناس نيام
إن جاك يوم يصالحك
قول ليهو الكلام
انت خليت لينا شنو عشان نقولو وزي ما بتقول حبوبتي فاطنة السمحة الله يرحمه ويغفر ليها:
(نان ات كان قادر عليه بتلحفو مالك) فما تجهجهنا وتجرسنا معاك …
سماعين ووردي قدمو للشعب السوداني الشجن والفرح مابين الوصية ولو بهمسة …
لكن بالدارجي الوصية دي بتخلي كل السودانين كمحبين لاغنيات الشجن الإحائي يسرحوا بعيد مع القلب والمحبوبه والشخوص والامكان التي تربطهم بها زكريات وحنين ..
*رهف اخير :*
السمع الوصية اكيد شاف وصف سماعين وشاف لحن وردي في توصيف العذابات ، تحس كأنها حاجة مكتوبه عشان انت تسرح في حاجات تخصك أو تحس انها تتكتب كواحده من وصفات الحب لايتم العيش دون سماعها :
حلفتك يا قلبي حملتك أمانه
الفاتت عهود ما تبكي عشانه
حلفتك تقول لي إيه آخرة بكانا
الدنيا الجميلة والحزن الحلال
الطير في غصونو
الساجعة في حنانا
كل الناس تغني
ليه نحن الهم طوانا
اوكما زكرته في بداية المقال حبو (الحب الكامل) كامل الشجن وكامل الاحساس بالمحبة
*رهف منفصل :*
الوصية دي عليكم الله براها ما حكاية …
اللهم ارحم كل من رحلو منا وخلدهم وجدان هذا الشعب …
محبتي_التي_تعلمون 💜🇸🇩
