شخصيات سودانيةشخصيات من كردفان
من كردفان | فيصل حيدر حمد السيد | الهشاب (كعكول الصمغ) الدكتور الشاعر عبد الله إساماعيل
صوت الشارع
من كردفان | فيصل حيدر حمد السيد | الهشاب (كعكول الصمغ) الدكتور الشاعر عبد الله إساماعيل
كتب/#فيصل حيدر
في واحدة حنكوشة سألوها بتعرفي الهشاب (وكعكول الصمغ) قالت لاسمعت ولا شفت!!
رد عليها الدكتور الشاعر عبد الله اسماعيل بقصيدة الهشابة:
في زمتك يابنيه..
ما شفتي الهشابه…
ولا المطره ام زويق
الزرقن سحابه..
ولا حتي ماشفتي السعن
جلباغه مويتو..
ولا كسرت فرع الأندرابه.
لا شفت عتمور ولا هويره
ولا مشقه..
ولا طويرات.. أم جليلي
الركت دهابه…
في زمتك !!!
ماشفت حلالنا الجميله
لا أم عشيره ولأم كتير
ولا أم حميره.
ولا ام رهابه…
لاقليصه ولا التميد
ولا البشيري الناعم ترابه
لاشفت زير ولا حتي بير
ولا الدلو الجنب الحفير..
ولاشربت من موية أمروابه…
في زمتك !!!
ماشفت نفير حراتة
ولا ضقت يوم
طعم أم ظماطه…
ولاحتي ماسمعتي قولهم
وبالحرير تميتي الخياطه
في زمتك !!!
ماشفتي مرحاكة الطحين…
ولا المدقوق مدمرق..
فوق جراب عبارو هيين
ولا بالقديم خمجتي طين
ولا سمعت يوم بالمرفعين
في زمتك !!!
ماسافرت يوم
أم صيقعون…
لادقيتي فندق ولا ضريتي غله..
ولا لعبتي أم قيردون
ولاجغجغت بالقشه السنون…
ولا دفقت مويه علي السرابه…
في زمتك !!!
ماضقتي يالسمحه البليله
ولا قندول فريك
مملول مليله…
ولاسمعت يوم.
حبوبه قالت (يافليله)
لا ضقت هالوك..
لاتبشا رخص…
ولاسمعتي خالو
القال للوليد (ود البقس).
في زمتك !!!
ماشفتي يالسمحه البلوم
ولا كاشمتي يوم
شافعا شروم ..
ولا حصل كديتي دوم…
ولا زغرتي في فرح القرابه..
وفي زمتك ماشفتي الهشابه…!!!!
بقول ها بني خبارك ؟؟؟
استنطي قولي
وخلي بالك…
وخلي عزك لديارك
يبقي أقرب سوارك….
**************
#الاصل ماصورة في الاستوري الاصل جلسة صفاء مع الحبوبة هناك بتلقي الحقيقة البترد الروح مكانها
بتلقي حب الوطن ماشعار ده ريحة مطر.
بتفهمي انو الهوية مابتورث في التلفونات بتورث في الكلام في الذاكرة الرجعة للجزور مارجوع ده شحن للمستقبل. الزول الماعارف جاي من وين مستحيل يعرف ماشي وين “والماعندو قديم ماعندو جديد” “والنسي قديمو تاه”
#تحية من القلب للدكتور الشاعر عبد الله اسماعيل شاعر التبلدي والدعاش وبراق العينة والمطر كابي فينا.
كلماتك ماعتاب دي دعوة رجوع للاصل. دعوتك وصلت والدرس بسيط وعلم “الاصل ماببقي صورة” والعز الحقيقي في التراب واللغة والذكريات
وانا بقول ليك.
ارجعي شوفي تراب اهلك
فيهو تراب امك وخالك
فيهو عزك فيهو فالك
مابينفع عزك يغيب
واصلك في الروح قريب
