صوت الشارع
مقالات وكتاب
هترشات | شوقي سليمان أحمد | الفرق بين الكارثة والمصيبة والعطالة
قايتو لما الرأس يكبس ويحصل ليك قفلة . و تبلد فكري من كثرة الضغوط والوضع الكل يوم زاىد قساوة و معاناة وإرهاق فى كل شئ … الفكرة ذاتا بتجوط .. الواحد ما بعرف هو شايت وين ..لاعب مع ياتو فريق… أبيض ولا أزرق..
تقعد تلكم في نفسك براك !! يااااخ دي مصيبة شنو الوقعنا فيها..
تاني تردد فى سرك والله دي كارثة!!
بعد شوية تقول والله السوتا فينا العطالة دي النجار فى الخشب ما سواها 🤣🤣.
مع انو من البديهي انو الكوارث دي بمعناها الحقيقي بتكون شاملة وعامة لكل الناس.. بتجي بدون استئذان .. زي الحرب دي كارثة كبيرة ما عندنا فيها يد … ولا حبل ولا ناقة ، اها دي جابت لينا معاها كل المصائب .. فقر وجوع وتشرد و نزوح … المصيبه الأكبر أنها فرقت الاصحاب والأصدقاء و زملاء العمل… الأهل ديل بقوا أصلآٓ ما فارقة معاهم ، انت و جيبك بس … هو البتحدد موقعك الجغرافي بينهم..بالعربي كدا ما عندهم ليك حاجة إلا فى حالة واحدة بس !! .. تكون جلابي.. كدا انت الحب والريد والشوق .. وسيد الناس.
أما الضلع الثالث لهذا المثلث .. العطالة المقننة…ودا الضلع الأخطر على الإطلاق… عمرك ما عرفت تقعد تحت حيطة فى ضل الضحى.. وكمان بقيت معلم فى لعبة الليدو.. مع إنك زول مثقف ومتعلم، و شايل شهادات قدر الضربة..
تخيل معاي قدر شنو الناس المتعلمة و ما لاقية شغل فى البلد دي .. ليها حق الحياة تقيف، والبلد كلها تقيف… اذا كان عندك علماء اي زول فى مجالو شغالين ستة و يك.. و اتحرولوا من ضل لي ضل 😭😭.
لخلاصة:
الكارثة بتدمر الحجر، والمصيبة بتوجع القلب، لكن العطالة بتقتل المستقبل بالبطي.. وتقتل أمة
كاملة..
وإحنا في السودان عايشين كل الظروف سوا.. حرب عملت كارثة، كل بيت فيهو مصيبة، والشباب كلهم بقو عطالة..والعقول ذاتا انشلت تمامآٓ.
