صوت الشارع
مقالات وكتاب
هترشات | شوقي سليمان احمد | اسرار الفلس
اي حاجة فى الدنيا دي عندها مدرسة خاصة فيها استاذ و مدير وغفير ، كتب و كراسات وسبورة وطباشير…المهم ما بتمرق ساي بتطلع بي علم جديد و منهج جديد تكون إضافة للحاجات العندك.. زيادة خير 🤣🤣
اها مدرسة الفلس دي مدرسة خاصة جدا، المدرسة الوحيدة الما بتمنى زول يدخلها، لكن هى بتدخلك بدون توربك…يعنى سيك سيك معلقة فيك…زي ما قال ابوالسيد من اي قاسم مشترك بتدخلك،، بتعلمك وبتوريك صلحيك من عدوك.. زي الرادار يتكشف ليك مكان العدو البتلقى محمر ليك سبب برا سبب..
من اسرار الفلس السردبة يعنى يكون جلدك خشن تتحمل كل الضغوطات ، تكون عندك قابلية لكل انواع العصرات، لما تجيب الزيت، تكون مصندد، كأن شئ لم يحدث ، تتحمل كل الضربات المؤجعة، وكل ما تسردب كتير جلدك بتخن و بتتحمل اكتر ، و كدا بتقدر تقاوم الفلس بكل أنواعه.. فالسردبة نواع من أنواع تجاوز المطبات الضيقة .. لعملية الفلسة المعقدة التركيب ، و احيانا السردبة تعمل حماية من بعض المتطفلين فى حياة الٱخرين .. الناس الحُشريين الما بخلو الناس فى حالم.. مفلس ما بخلوك و مفرش ما بخلوك… عشان كدا قانون السردبة هو قانون يحمي من المغفلين.
