رهف الاحساس | قصي بشير عباس | شعب يحب البكاء والجرسة
من زمان ونحنا ونحنا ونحنا ، شهامة رجوله نخوه كرم وكل الصفات الجميلة هي حقتنا وبتشبهنا ، لكن عمرنا ما اعترفنا باننا بكايين وبتاعين جرسه …
ح تقول لي كيف (ككيف الكلام دا) طيب اعتبرني غلطان وتعال نسمع مع بعض :
قبل ميعادنا بي ساعتين
أبيتو انا واباني البين
اغالط نفسي بي اصرار
واقول أمكن انا الما جيت ..
كيف الموضوع دا جرسه ولا ما جرسه ؟
ولا اقول ليك :
اغلطو انتو يا حبان..
نجيكم نحن بالاعذار …
انا كان محلهم يومي بديك واحد غلط مصلح عشان استمتع بالنصوص دي …
عذبني وزيد عذابك
يمكن قلبي يقسي …
دي مرحله صعبه شويه من الريده لكن الاصعب منها :
بدون عينيك بصبح زول
بدون ذكرى وبدون ميلاد …
زول ساي زول زيك وزي التمهيداب لا ذكري لا ميلاد ياكافي البلاء حاول اسمع ليك اغنية مختلفه عن مود الجرسه دا وابقي خواف :
لسه خايف من فراقك
لمن احصل ببقا كيف
زي ورد في عز نداهو
خوفو بكره يزورو صيف …
الناس تصبر يا جماعة وربنا ما يجيب فراق بس الشاعر لما يفكر خارج الصندوق ح يكون الابداع في ما سيحدث وليس ما حدث …
وعشان ما تسرح بعيد خليك مع :
نجمة نجمة الليل نعدو
والسنين من بينا عدو
انت ما عارف عيونك
لما تسرح وين بودو …
ما تسرح واسمع كمان :
أشد ساعد على المجداف
واقول يا انتي يا اغرق ..
واخاف غيم المني الشايل
تسوق الريح ويتفرق …
واخاف الضفة ترجع
بيك قبل الحق …
لو واصلنا في الجرسة السمحة دي ما نجد مساحة لسماع اي غناء دون مستوي الجمال دا عشان كدا الناس تتماسك وتصبر وتعد النجوم وتبكي في حته بعيده زي المغتربين لما يشتاقوا للبلد وقلنا شنو :
قلنا ما ممكن تسافر
لو تسافر دون رضانا
نشقى نحن الدهر كلو …
أي حاجة تخلي سفرك
حتى لو أسبوع أقلو …
الحب والظروف (قلنا ما ممكن تسافر عايزه مقال منفرد لانها بعيد عن علاقته بجميل اغنيات (الجرسة) التي اتحفنا بها فناني وشعراء وطني الاماجد الذين اثروا خارطتنا الغنائية، تظل الحب والظروف نقطة تحول في تاريخ الاغنية السودانية نحكي عنها في المقال القادم).
#رهف_اخير
كمستمتع بتحب غناء الجرسة بتعجبك وبتجرسك اي اغنية ؟
محبتي التي تعلمون💙🇸🇩
ََ
