محمد عبد الماجد
جاب المهاجم السوبر وشال مدير الكرة السوبر!!
بدأت أشك في الحكاية، ولقيت لي طبنجة وعوض زايد وعلي جعفر العذر.
علي جعفر ذنبهُ شنو؟
يعني جان كلود دا ما معقول.. فجأة يظهر في بورتسودان.. فجأة كدا يقولوا ليك في الدامر.. نحن قاعدين كدا ومن غير مناسبة يقولوا ليك فجأة مدّد فترة تعاقده مع الهلال.
فجأة جان دي يوم بتكتل ليها زول.
فجأة يصل تنزانيا وينضم للمعسكر كأول لاعب ينضم للمعسكر.
ننوم ونصحى يظهر فجأة مع المنتخب البورندي.
اليوم التاني نقوم فجأة كدا يقولوا ليك جان جاهز لمباراة الجيش.
بصراحة البعمل فيه (جان) دا ما عمل زول عادي.. الشغل دا ما طبيعي.
عليه أنا بشوف على ناس المريخ أن يعملوا لطبنجة (محاية) يشرب مويتها، تثبته شوية، أو يشوفوا ليه (حجاب)، عشان (الجن) البعمل فيه جان كلود بطفش منكم (الباكات).
الشئ التي لم أجد له تفسيراً هو أنّ جان كلود في المريخ لم يطح بالباكات فقط، الزول دا أطاح ليه بأربعة رؤساء من المريخ.. كل ما يمر ليه من (باك) بشيل ليه (رئيس).
سوداكال قالوا خلى (لوزان) وبقي مصاقر (جان كلود)، أي مباراة قمة، الهلال بشيل ليه (مجلس).. البعمل فيه جان، المحكمة الرياضية الدولية ما قدرت عليه.
بكرة أحدثكم في (صَـابِنّها) عن القرار المؤسف بإقالة مدير الكرة عبد المهيمن الأمين.
للأسف الشديد نحن في السودان ضد الناجحين وضد النجاح في نفسه.
يا العليقي يعني عملت شنو؟ جبت المهاجم السوبر وشلت مدير الكرة (السوبر).
الهلال دا مشكلته في ناس الهلال.
كنا فاكرين المشكلة في البلد دي في (الحرب) ، المشكلة طلعت في حتة تانية خالص….
بكرة نقول شهادتنا لله، فقد اعتدنا أن نشهد لأهل الفضل.
وما في زول يقول لي دا ما وقتهُ هسه، لأن القرار أصدره مجلس الهلال في توقيت غريب، ولم نصدره نحنُ.. وأظن لنا حق التعليق من أجل الهلال، لا من أجل الأشخاص، هذا الكلام قولو لمجلس الهلال ـ الاستعجال على شنو؟ كان تننظروا سيكافا تنتهي.
كلما نقترب، أشعر أنه مافي فائدة.. ولا خير فينا إن لم نقلها.
